Хэнэйшье мэдэһээр, буряад хэлэеэ мэдэхэ хүнүүднай жэлһээ жэлдэ үсөөрнэ гэжэ мэдэнэбди, энэнь юунһээ дулдыданаб гэхэдэ,  хара багаһаа хүүгэднай сэсэрлигтээ, һурагшаднай һургуулидаа, бүдүүн зомнай ажабайдалдаа гансахан лэ ород хэлэ хэрэглэнэ ха юм. Тиимэһээ мүнөө яряанай хэлэ үдэр бүриин ажабайдалда хэрэглэжэ, буряад хэлэеэ хүгжөөхэ аргануудые бэдэрхэ тон шухала болоод байна. Бүгэдэ буряадай үндэһэн соёлой эблэл «Буряад ТВ» субагтай суг хамта «ҮЗЭсХЭЛЭНтэ Буряад» гэһэн шэнэ дамжуулга бултанда дурадхаба.  Апрелиин 15-һаа энэ түсэл дээрэ гүнзэгы удхатай шухала ажал эмхидхэгдэжэ эхилэнхэй, эгээ түрүүшын дамжуулга эблүүлэн зохёогдожо байна. Бүхыдѳѳ эндэ 5 ехэ дамжуулга буулгагдажа, июнь һараһаа Буряад ТВ субагай сэнхир дэлгэсэдэ бэлэн боложо гараха. Буряад хэлэеэ һайн мэдэхэ 3 бэрхэ заабаришад энэ түсэлдэ хабаадагшадые дахуулна. Тиихэдэ багша тэдэниие  хэшээлдээ буряад хэлэндэ һургахадаа, юугээр һонирхуулха  байнаб, хайшан гэбэлнь тэдэнэр буряад хэлэ дуратайгаар үзэхэб, ямар арга хэрэглэбэлнь, бэлэхэнээр хадуужа абахаб, гэхэ мэтэ олон асуудалнууд гаража ерэнэ. Оршон сагта түрэл хэлэеэ мэдэхэ, үзэхэ гэһэн мэдэрэл олохон хүнүүдэй зосоо түрэнэ, тиимын тула энэ ябуулга арад түмэндэ ехэл хэрэгтэй, удхатай гэжэ һанамаар.