Хэлэ шудалалга гээшэ шэнэ үгэнүүдтэй танилсахаһаа гадна, арадайнгаа соёл, ёһо заншал, түүхэ һайнаар ойлгохо арга боломжо ха юм даа. Филипповэй нэрэмжэтэ Буряадай гүрэнэй хүдөө ажахын академиин дэргэдэ партануудай саана энэ удаа оюутад бэшэ, харин хотын ажаһуугшадтай үдэр бүри хүдэлдэг зон һууба. Нютагай засагай алба хаагшад «Буряад хэлэ сахин хүгжөөлгэ» гэһэн программын хэмжээндэ буряад хэлэ шудална.
Тус программа түрэл хэлэеэ сахин хамгаалгада ба тэрэниие хэрэглэлгын һалбариие үргэдхэлгэдэ шэглүүлэгдэнэ. Нютагай засагай алба хаагшадта хэшээлнүүд үгын сан нэмээжэ, буряад хэлэн дээрэ харилсаха дадал шудалха арга боломжонь боложо, үдэр бүриинь ажалда хэрэгтэй болохонь лабтай. Һуралсал хоёр долоон хоногто үргэлжэлөө, харин октябриин 16-да бүхы 35 хабаадагшад дүнгэй шалгалта тушааһан байна.
Дүнгэй шалгалта хадаа энэ программын түгэсхэлэй шата бэшэ, харин хабаадагшадые үшөө телесубагууд болон радиостанцинуудта буряад хэлэн дээрэ интервью үгэлгэ хүлеэнэ. Энэ хадаа олоһон мэдэсэеэ бодото хэрэг дээрэ хэрэглэжэ, буряад хэлэеэ ниитын ажабайдалда бүри эрилтэтэй болгохо арга боломжо гээшэ. Имагтал бодото харилсаанда хэлэн сахигдажа, хүгжэжэ, удаадахи үенүүдтэ дамжуулагдадаг ха юм.
