«Буряад ТВ» субагай эмхидхэһэн түрэлхи хэлэн дээрэ видеобуулгабаринуудай «Найдал» гэһэн 4-дэхи телевизионно мүрысɵɵн түгэсэбэ. Эндэ бүхы уласай һургуулинууд болон байгша ондо Үбэр-Байгалай хизаарай Агын тойрогой hургуулиин шабинар тон эдэбхитэйгээр хабаадаба, тэрэ эхин болон ахамад ангиин һурагшадай тэмсэхэ 2 номинацитай байгаа. Шүүгшэд ороһон ажалнуудһаа 20 эгээл эрхим видеобуулгабаринуудые шэлэжэ абаһан байна.

Мүрысөөнэй дүнгүүдээр эхин ангиин һурагшадай хоорондо Хэжэнгын аймагай Цырен-Доржо Дамдинжаповай нэрэмжэтэ Могосохоной дунда һургуулиин 4-хи ангиин шабинар түрүү һуури эзэлээ. Ахамад ангиин hурагшадай хоорондо Улаан-Үдэ хотын 49-дэхи hургуулиин 5-дахи «А» ангиин шабинар илажа гараа. Энээнһээ гадна эдэл hурагшадай ажал харагшадай дура буляаһан гэһэн шэглэлэй шанда хүртэбэ.

Илажа гараһан хабаадагшадта гаргаша даагшад диплом болон мүнгэн шангуудые барюулаа. Шангай жаса 250 мянга гаран түхэриг байгаа гэжэ һануулая. Энээнhээ гадна Агын Тойрогой эблэлэй зүгhөө мүрысөөнэй илагшадта аяар хорин дэгэл малгайнуудтайгаарнь бэлэг барюулагдаха юм.  Заншалта болоһон мүрысөөн байгша ондо Гүрэнэй арадуудай нэгэдэлдэ зорюулагдаа. Гэхэ зуура, үнгэрэгшэ жэлдэ гансал Уласай hургуулиин һурагшад мүрысөөндэ хабаадаха аргатай байгаа, байгша ондо Үбэр-Байгалай хизаарай Агын Тойрогой һургуулинуудhаа олон хабаадагшад ажалнуудаа эльгээгээ.