«Тэбэг» гэһэн үндэһэн нааданай холбоон байгуулагдаһаар жэл гүйсэбэ. Энэ хугасаа соо Буряад Уласай 5 аймагта, мүн Үбэр-Байгалай хизаарта бүхыдөө 11 мүрысөөн үнгэргэгдөө. Федерациин юрэнхылэгшэ - Виталий Раднаев тусхайтаар эмхидхэгдэһэн дүхэриг шэрээдэ жэлэй туршада хэгдэһэн ажалай дүнгүүдые согсолжо, һаяын сагай түсэбүүдые табиба. Дүхэриг шэрээн хүдэлмэридэ онлайн аргааршье зон хамтаржа, хүдэлөө. Арадай Хуралһаа, Тамирай яаманай түлөөлэгшэдһээ болон бэеын тамирай багшанарһаа гадна сэхэ дамжуулгын гуримаар Эрхүү можын Усть-Ордын тойрогой болон Үбэр-Байгалай хизаарай Агын тойрогой зон зүблөөндэ хабаадаа.

Дүхэриг шэрээдэ хабаадагша Улаан-Үдын 47 -дохи һургуулиин бэеын тамирай багша Даниил Бельский «Тэбэг» нааданай һайгаар гүрэн дотороо эрхим залуу багша боложо, тодороо.

 Тэбэг гээшэ үе мүсэдэ туһатай, шуран, солбониие хүгжөөдэг үндэһэн наадан юм. Тиин hаяын сагта Тэбэг - арадай үндэһэн тамирай зүйл боложо магадгүй.