Агын багшанарай колледждо 1996 ондо хүгжэмэй багшанарай мэргэжэлэй таһаг нээгдэһэн юм. Тиигэжэ Агада тусхай мэргэжэлтэй, үргэн дүй дүршэлтэй дуу хүгжэмэй багшанарые гаргадаг болоо. Мүнөө жэл таһагай байгуулагдаһаар 30 жэлэй ойн баяр тэмдэглэгдэнэ.

Эгээл түрүүшын халаанай оюутадай тоодо мүнөө олондо мэдээжэ дуушан, А. В. Александровай нэрэмжэтэ Россиин армиин дуу хатарай академическэ ансамблиин солист Баясхалан Ламажапов. Хамта дээрэ мүнөөдэрэй сагаар 195 оюутад эндэһээ урган гараа.

Оюутад эрхим һуража, ганса багшалха дүй дүршэлтэй гарана бэшэ. Мүн дуушадые һургаха, олон хүнэй хор табижа, хүгжэмэй элдэб зэмсэгүүд дээрэ наадажа шадаха болоод гарадаг. Ехэнхи оюутад колледж түгэсхэһэнэй удаа дуушадай гү, али хүгжэмшэдэй мэргэжэлэй харгы шэлэдэг.

30 жэлэй туршада хүгжэмэй таһагта дүршэл ехэтэй багшанар ажаллана. Харин дуу хүгжэмдэ, соёлой талаар урагшатай, холын хараа бодолтой багшанар 1960-1980-аадшье онуудар хүдэлһэн юм. РСФСР-эй габьяата багша Дашицырен Жамбаловай нэрэмжэтэ хүгжэмэй арадай зэмсэгүүдэй ансамбльнуудай хоорондо харалга мүрысөөн эмхидхэгдэдэг. Тиихэдэ Валерий Воронов багшынгаа дурасхаалда зорюулан хорнуудай хоорондо урилдаан байгуулагдажа, ажалынь мүнөөшье болотор үргэлжэлүүлэгдэнэ. Дагба Ринчинов, Ринчин Балдандашиев мэдээжэ хүгжэмшэдэй хэрэг оршон сагта нангинаар баһал сахигдажа, ерээдүй халаан оюутадта Светлана Дагбаевна, Баир Ринчинович ба Лариса Владимировна гэгшэд дамжуулһаар.