«Дуунуудыем, нүхэдни, дурасхаал болгон дурдажа, дуулан ходо ябаарайт!» Энэ үгэнүүдээр Буряад арадай поэзиин хонгёо уран шүлэгшэ  Даша Дамбаев «Захяа» гэһэн шүлэгөө эхилһэн байна. Оройдоол 37-тойдоо наһанһаа нүгшэхэдэнь, нэрыень мүнхэлхэ талаар Ханда Цыретаровна эгэшэнь тон ехэ ажал ябуулаа. Мүнөө сагта эжынгээ эхилһэн энэ буянта хэрэгые Людмила Александровна Банзаракцаева басаганиинь саашань үргэлжэлүүлнэ. Энэ ном уран шүлэгшын зээ басаган Людмила Александровна Банзаракцаева суглуулан бүридхэжэ, хэблэлдэ бэлдээ. Даша Цыретарович мүнөө амиды мэндэ ябаа һаа, 86 наһа гүйсэхэ байгаа, тэрэ Сэлэнгын аймагай Харганаа һууринһаа уг гарбалтай. Номтойнь танилсалгын уулзалгада нютагайнь хүндэтэ айлшад уригдаа, юрэ Буряадай уран шүлэгшэ Нина Тогтохоевна Артугаева Даша Дамбаевта зорюулжа, шүлэг бэшэһэн байна.Буряадай Үндэһэтэнэй 1-дэхи лицей-интернадай шабинар шүлэгүүдые уран һайханаар уншажа, сугларагшадай зүрхэ сэдьхэл хүдэлгөө. Поэдэй иимэ нангин захяагаар уран зохёолой үдэшэдэ эдиршүүлэй, залуушуулай хабаадаһандань баясамаар. «Буряад дайдын хүбүүмби, һайхан сагай жэгүүрби» үдэшэдэ поэдэй шүлэгүүд, дуунууд зэдэлжэ, олоной сэдьхэл доһолгобо.