Үнгэрэгшэ амаралтын үдэрнүүдтэ заншалта болоһон «Кубок Рампиловых» гэһэн хүл бүмбэгөөр 15-дахи мүрысөөн элдэб наһанай хэдэн арбаад бүлэг зонуудые  суглуулба. Эдир наһатайшуулай дунда мүрысөөндэ түрүүлэгшэд хадаа 2008 ондо түрэһэн Хэжэнгэ нютагай һурагшад болоно.Эдир хүл бүмбэгэшэдэй бүлэг бүхэн соо үсэд хатуу тэмсээн үргэлжэлөө. Энэнь ойлгосотой, юундэб гэхэдэ, Хэжэнгэ нютагаархид энэ тамирай нааданда тон дуратай ха юм.45 наһанһаа дээшэ ветерануудай хоорондо тиимэшье олон мэдүүлгэнүүд ороогүй, гэбэшье «Хэжэнгэ –Улаан-Үдэ» гэһэн бүлэг илагшад боложо тодорһон байна. Гэхэ зуура 17 бүлэгүүд өөһэд хорондоо гол кубогай түлөө наадаа. Түрүүшүүлэй тоодо нютагаархид, гвардиин сэрэгшэд, 102-дохи бага хороогойхид болон урда жэлдэ шалгаржа гараһан «Ушхайта-сити» бүлэгөөрхид оробо. Олохон бүлэгүүдэй бүридэлдэ Буряадаймнай супер-лигын хүл бүмбэгэшэд наадаа, иимэ дүршэлтэй бэрхэ нааданда оролсогшодой хабаадалга хадаа аймагтамнай тус тамирай наада хүгжөөлгэдэ ёһотойл туһа боложо үгэнэ гэжэ эмхидхэгшэд тэмдэглэнэ. Иигэжэ нааданай дүнгүүдээр түрүүшын хоёр һууринуудта «Загустай-сити» болон «Загустай» команданууд хүртөө, 3-дахи һуурида манай Буряад ТВ субагай бүлэг, тиихэдэ тус бүлэгэй нааданда саха хамгаалагша Норбо Жамбалов эрхим наадагша боложо шалгараа.