Улаан-Үдэ хотын захиргаанда хотын засаг даргын орлогшо Ирина Ковалёвагай ударидалга доро буряад хэлэнэй комиссиин ээлжээтэ зүблөөн үнгэрбэ. Эндэ ниитын оршон байдалда, тамирай эмхи зургаануудта, унаа тээбэриин һалбарида, эд хэрэглэлгын дэлгүүртэ, залуушуулай дунда буряад хэлэ сахин хүгжөөлгын асуудалнууд зүбшэн хэлсэгдэбэ.
Буряад хэлэн дээрэ оршуулагдаһан гаршагтай хабтагайнууд эмхи зургаануудай, хотын дэлгүүрнүүдэй, һуралсалай газарнуудта үлгэгдэнэ, гадна хотын ниитын унаануудай тогтохо буудалнууд хоёр хэлэн дээрэ соносхогдоно, залуушуулай дунда буряад хэлэ сахин хүгжөөхэ талаар элдэб хэмжээ ябуулганууд, мүрысѳѳнүүд үнгэрнэ гэхэ мэтэ сэдэбүүдээр элидхэлнүүд хэгдээ.
Зүблѳѳндэ сугларһан комиссиин гэшүүд элидхэл хэһэн зонуудтай һанамжануудаараа хубаалдаа, дурадхалнуудаа оруулаа, саашадаа хамта ажаллаха тухай хэлсэһэн байна.
Буряад орондо буряад хэлэ сахин хүгжөөлгын программа хэдэн жэлэй туршада амжалтатай бэелүүлэгдэнэ. Эндэ засаг түрын, нютаг һуурингуудай захиргаануудай болон эрдэмтэдэй оруулһан хубита ехэ. Ээлжээтэ буряад хэлэнэй комиссиин зүблөөнэй эсэстэ хотымнай эмхи зургаануудай ажал энээн дээрэ тогтохогүй, үргэлжэлхэ байха гэжэ дүнгүүд гаргагдаа.
