Эхэ зургаан зүйл энхэ тайбан, элүүр мэндэ, хэрэг бүтэсэтэй, үшөөшье нэгэ шухала һанал – сэрэгэй тусхай ябуулга мэнэ түргэн дүүрэжэ, хүбүүднай гэртээ бусаг! Сэдьхэлдээ иимэ бодол шэнгээhэн hүзэгтэд «Бархан баабайдаа» мүргэнэ.
Заншалта болоhон «Бархан уула тахилга» уншалга Ивалгын дасанай дэргэдэ һүүлэй хэдэн жэлдэ үнгэрнэ. Эндэ Баргажанай, Хурамхаанай аймагhаа гарбалтай hүзэгтэд сугларжа, түрэhэн тоонтынгоо шүтөөнтэй тахилгата тэнгэридээ мүргэдэг.
Һая болотор, арад зон Бархан баабайнгаа ямар дүрэ шарайтайень мэдэхэгүй байгаа. Тиимэhээ «Ламсан» дуганай бэлигтэй, уран гартай Булат лама түбэд номые шудалжа, дүрсынь зураг бүтээһэн байна.
19-дэхи зуун жэлдэ, Баргажан дайдада буддын шажанай дэлгэрхэ үедэ нютагай ажаhуугшад үндэр хада уулата үзэсхэлэн газартаа, Бархан баабай тэнгэридээ шүтэжэ эхилhэн түүхэтэй.
