Түрэл буряад хэлэн дээрээ уранаар бэшэхэ зондо дэмжэлтэ Агын Буряадай тойрогто яһала үзүүлэгдэдэг. Энэ удаа Сэбээн Жамцараногой нэрэмжэтэ номой сан Агууехэ Илалтын 80 жэлэй ойдо дашарамдуулжа, зохёолшодой дунда мүрысөө эмхидхээ.
Энэ жэл тус мүрысөөн наһанай хоёр бүлэгөөр үнгэрөө - 35 наһа хүрөөдүй, 35-һаа дээшэ зоной дунда. Хамта дээрээ 18 хабаадагшад зохёолнуудаа эльгээгээ. Тэдэнэй тоодо һурагшад, оюутад ба дүй дүршэлтэйшье зохёолшод. Ехэшүүлэй хоорондо түрүү һуури Ага-Хангилай Долгорма Долгоржапова эзэлээ. Хоёрдохи hуурида Баярма Жамсаранова, гурбадахи һуури Билигма Болотова Цыцыгма Эрдынеева хоёр хубаагаа.
Залуушуулай хоорондо Уртын һургуулиин Норбо Шойдоковой шүлэг түрүү һуурида гараа. Мүн Намсалма Доржипаланова, Очирма Сыхеева, Балбарма Дашиева гэгшэд эрхимүүдэй тоодо. Прозын түхэлэй зохёолнуудай шэглэлээр эмнэлгын дээдэ һургуулиин оюутан Санжита Бальжинимаева илажа гараа.
