Оросой ниислэл хотодо телесубагуудай Үндэһэтэнэй «Страна» гэһэн шагнал барюулгын баяр ёһолол үнгэрбэ. Телевидени болон радиогой үндэһэтэнэй жасын дэмжэлгээр энэ мүрысөөн эмхидхэгдэжэ, баримтата фильм, хүгжэм, клип бүтээдэг һалбариин эрхим хүдэлмэрилэгшэдые нэгэдүүлнэ.

«Страна» гэһэн шагнал хадаа соёл болбосоролой үнэтэ зүйлнүүдые олондо дэлгэрүүлхэ, дотоодын аяншалга хүгжөөхэ, эрдэмэй туйлалтануудые онсолон харуулха зорилготой түсэлнүүд дээрэ хүдэлжэ байһан бэлигтэй кино буулгагшад болон найруулагшадые дэмжэхэ зорилготойгоор байгуулагдаһан.

 Түгэсхэлэй шатада манай Буряад ТВ субагай хүтэлбэрилэгшэ Виталий Раднаевые тэмдэглэһэн байна. Тэрэнэй «Кочевник» гэһэн ажалынь шорт-листдэ орожо, дипломдо хүртөө. Фильм дотор Буряадай нүүдэлшэ арадуудай ажабайдал, тэдэнэй ёһо заншалнууд тухай хөөрэгдэхэһөө гадна, байгаалиин онсо үзэмжэ харуулагдаа. Тус фильм бусадшье мүрысөөнүүдтэ үндэр нэрэ зэргэдэ хүртөө гээд тэмдэглэлтэй. Тэрэ «Алтаргана – 2024» гэһэн нааданда эрхим түсэлнүүдэй тоодо орожо, «Алтан Саг» гэһэн сэдхүүлшэдэй мүрысөөндэ мүнгэн медальда хүртэһэн байна.

Энэ хэмжээ ябуулгада соёл урлалай түрүү хүнүүд, олондо мэдээсэл тараадаг хэрэгсэлнүүдэй болон засагай зургаануудай түлөөлэгшэд суглараа. Дотоодын киногой хүгжэлтэдэ, соёлой талаар үүсхэлнүүдые дэлгэрүүлгэдэ иимэ хэмжээ ябуулгануудай удха шанартай байһые хабаадагшад тэмдэглэбэ. «Страна» гэһэн Үндэһэтэнэй шан үндэһэн соёлой баялигые дэлгэрүүлхэ үүргэеэ үргэлжэлүүлһээр лэ.