Амтан эдеэнэй үйлэдбэриин богоhо алхалжа үрдеэгүй ябахада танил амтатай эдеэгээр байшанаар дүүрэн анхилна. Талханhаа эхилээд корж болгожо, удаань досоохи билуурыень бэлдэжэ, торт бүхэн хэдэн шата дабажа зүгынүүдтэл оролдостойгоор ажаллажа байhан дүйтэй мэргэжэлтэдэй гараар бэлэн болоно.

Юрын жэмэсhээ гурба дахин томо улаан жэмэс болон забаан зэдэгэнэ хаража үзөө hэн гүт? Тортодо орохо эдеэнэй эд бүхэн хүргэгшэ болон хүлдөөбэр соо наринаар хадагалаатай. Тус «Берёзка» гэhэн амтан эдеэнэй үйлэдбэри уласай ажаhуугшадые шанар hайтай, зохид сэнтэй тортнуудаар аяар арбаад жэлэй туршада баярлуулhаар. Гэбэшье, ажаhуугшадай дунда энэ бренд суутай, нэрэтэй болонхой. Гадна Буряад Ороной онсо амта зураглаhан, холо абаашахаар бэлэг болохо эдеэнүүдые хахад жэлэй саана үйлэдбэрилжэ эхилhэн байна.

Бэедэ туhатай нүүдэлшэ арадуудай заншалта хоолые шэнэ амтан эдеэнүүдэй гол үндэhэн болгожо замбаатай чизкейк үшөө тиихэдэ hамар, хатааhан борбоосгой, бал, сагаан дали гэхэ мэтэ буряадай баялигые нэмэжэ бэлдэhэн шэхэр үйлэдбэрилдэг болоо.

Шэхэрэй гадар хайрсагайнь зураг «Хэб-хаб» гэhэн зохёохы үйлэдбэринүүдэй түб «Сайн уу» гэжэ буряад соёл дэлгэрүүлхэ түсэлэй хизаарта зохёожо үгэhэн байна. Дүрбэн янзын замбаатай шэхэр бага, дунда болон томо хайрсагтай дэлгүүрнүүдтэ табигдана.

Тиимэhээ айлшадые угтажа хүндэлхэ, Буряад Ороной онсо амта зураглаhан тусхай бэлэг холын замда абаад ябахада болоно.