Мүрысөөндэ хабаадагшадай ехэнхинь наhанай амаралтада гараhан зон. Бүлгэмүүд соо таби, жара, жаран таба наhанhаа дээшэ тамиршад гар бүмбэгэ наадана. Гэбэшье, хабаадагшадай наhыень шууд хэлэхээршье бэшэ, булта хүнгэн, сарюун тамиршад зандаа.
Миниволей гэhэн тамирай нааданай янза хахад зуун жэлэй саана бии болоhон түүхэтэй. Харин һүүлэй нэгэ хэды жэлэй туршада дэлгэржэл байна. Багахан талмай, набтар сеткэ, 11 оноо болотор сагаа гурба хубаажа наадаха. Юрын иимэ дүримүүд нааданиие бүхы дуратайшуулда ехэ бэлэдхэлгүйгөөр наадаха арга үзүүлнэ. Харин мүрысөөндэ хабаадагшад нааданда харюусалгатайгаар хандажа, мэргэжэлтэ тамиршадтал тааруугаар хубсаланхайнууд шармайна.
Миниволейбол наадаха дуратайшуулай хамтарал «Оросой субад-Байгал» гэһэн уласхоорондын ехэ мүрысөөн болотор ургаа. Максимиха hууринда 2 үдэрэй туршада 80 гаран бүлгэмүүд суглараа. Тэрэ тоодо уласай аймагуудһаа, Үбэр-Байгалай хизаарhаа, Эрхүү болон Кемеровой можонуудһаа, гадна Монгол Оронhоо бүхы дээрээ 300 гаран хабаадагшад мүрысөөндэ оролсоо.
