Оршон үедэ тэбэг наадан хуушан сагта адляар һэргэжэ, олоной дунда дэлгэржэ эхилбэ. Гол түлэб, үхибүүдэй һонирхол татажа, тамирай талмайнууд дээрэ, мүн бусадшье нааданай газарнуудаар тэбэг сохижо байһан залуушуулые харахаар.

Агын Буряадай тойрогой тамирай залуу багшанар энэ нааданда анхаралаа хандуулжа, һурагшадай дунда нэбтэрүүлхэ гэһэн зорилго табинхай. Энэ хэрэг Агын тойрогой гимнази-интернадай багша Чингис Балдандоржиев ударидан, Үбэр-Байгалай хизаараар “Тэбэг” үндэһэн нааданай федерациин тусхайта таһаг хүтэлбэ. 

 Мүнөө халаанай хүүгэдтэ тэбэг сохихо гээшэ шэнэ наадан мэтэ. Оньһыень олохо хэрэгтэй, түрүүшөөр зоос газарта унажа, наадагшадай шунал түрүүлнэ: унаха бүринь, үшөө оло дахин сохихо дуран хүрэнэ. 

Тэбэг хадаа тон лэ арадай наадан. Туулган ба хониной арһаар хэһэн зоосһоо бэшэ юумэн хэрэггүй. Харин тэрэ мүртөө энэ наадан бэеын тамир ехэ хүгжөөнэ: хүл гар хүнгэн болоно, хүүгэд түргэн, шуран болоно, шүрбэһэ мяхан шангадана. Үшөө тиихэдэ, олоороо наадахада бэри һонирхолтой – хэниинь тон оло дахин сохиноб гэжэ элирүүлнэ. Үбэр-Байгалда тэбэгэй федерациин тусхайта таһаг нээгдэжэ, буряад арадай наадан үндэһэн тамирай зүйлнүүдэй нэгэн боложо, хүгжэхэнь дамжаггүй.