Буряад ТВ субагай олондо һайшаагдаһан “Харанхы” гэһэн сериалай хоёрдохи хаһа буулгагдажа эхилээ гээд соносохоо һэмди. Энэ зундаа манай телесубагай мэргэжэлтэд Виталий Раднаев захиралайнгаа ударидалга доро Үбэр-Байгалай хизаарай Агын Буряадай тойрогто ажаллаа.
Августын хуушаар лэ буулгабаринуудаа түгэсхэхэ тээшэ болообди. Һануулан хэлэхэдэ, “Харанхы” сериалда гол геройн дүрэ Буряад театрай зүжэгшэн Булат Буралов наадана. Харин бусад рольнуудта юрын зониие кастинг хэжэ шэлэн абаабди. Хоёрдохи хаһада баһал юрын зон наадана. Энэ удаа буулгабарида Согто-Хангил нютагай Батоевтанай 6 хүүгэдэй одхон 6 наһатайхан Сарюна оролсоо. Ехэшүүлтэй адли хэдэн часай буулгабари тэсэжэ, шадамар бэрхээр наадаа. Шухалань – түрэл буряад хэлэн дээрээ текст түргэн саг соо сээжэлдэжэ шадаа.

 Буряад хэлэнтнай саашаа гарахадтнай хэрэгтэй болохо гээд хүүгэдтөө заадагбди гээд Наталья Батоева нэмэнэ. Үнэхөөрөөшье, манай сериалай герой Эрдэм хүбүүн Улаан-Үдэ хотоһоо Бархан нютаг руугаа бусахадаа түрэл хэлэн дээрээ хөөрэлдэжэ эхилнэ, сэдьхэлыньшье һаа буряад боложо, элинсэг хулисагуудһаа дамжан ерэһэн ёһо заншалаа сахижа, түүхэеэ мэдэжэ, хүндэлжэ, сэгнэжэ эхилнэ. Бүхыдөө харанхы тунхаг байдалһаа гарана. Эгээл энэ һанаа бодол бидэ сериалайнгаа гол удха шанар болгон харуулнабди. Хоёрдохи хаһада наадаһан зүжэгшэднай энэ хэрэгыемнай ехэ дэмжэнэ. Тэрэ тоодо “Амар сайн” гэһэн дуу хатарай үндэһэтэнэй театрай гол дуушан Бажигма Цыбенова. 

Сентябриин эхеэр хоёрдохи хаһымнай түгэсхэлэй буулгабаринууд хэгдэхэ. Тиигэжэ сериалаймнай удаадахи шата эхи абаха – монтаж. Буряад ТВ субагай сэнхир экранда гараха тухай заабол дуулгахабди, хүлеэн байгаарайгты! Сүлжээ холбоонуудтамнай бэшүүлэгты, тэндэл соносхол үгэхэбди.